Heimatverein Warendorf

Platdütsker Krink im März:
In,n Mäten de Buer sien Hektor inspannt

Warnduorp. Lesten Middewiärken schallere et düör dat Kolpinghuus „In,n Mäten de Bue sien Hektor inspannt, he sett siene Kämpe un Wiesken instand….. De Lüe von den Plattdütsken Krink freieren sick üöwe dat helle Wiär un sangen ut voller Buorst. Jederene, de an de Ostpoat vöbie kam, konn den laut Gesang höen.

Met Fröhjaohrsvetellsels gongt  in dat besinnlike Programm. „Weidekättkes,- Veer Wiärken trügge is de Natur – Pralinen von Sophie – Et geiht wiee up Ostern an – De Gaon von Annette von Droste Hülshoff – Fastaobend in,n Stall – Dat Lüt moss met de Frau nao den Doktor hen – Mathilde Kempkes, Resi Hülsmann, Anni Dopheide, Heinz Beckhove, Gerda Dillmann, Roswitha Wienstroer, Josef Strotmeier und Werner Elpers wassen de Vödriägers düssen Nommdag. Nao dat Leed „Alle Vügel sin wiee dao…kammen de lustigen Vetellsel un et gaw derbe wat to lachen. Jans un Bänd wassen up,n Markt un wollen nen Pony fö de Enkel kaupen, dabie gawt Probleme biet Watelaoten.Tresken was dat erste Maol up Mallorca west un vetellere wat von so nen schwatten Jonny. Fennand was up enen 120 Mourn Hof in Aohlen ant frieen. So gong nen feinen Krinknommdag up sien Enne to. Met dat plattdütske Leed: Dao wäd nao Plattdütsk küert, dao wäd nao Fröndschaft mürt, in,n Plattdütsken Krink – göngen alle vegnögt nao Huuse und man freit sick aoll up dat neichste Maol an,n Middewiärken, 7. April – 16.30-18.00 Uhr in,n Kolpinghuus.

Klicke auf die Bilder, um sie groß zu sehen